এটা সময়ত ভাৰত আৰু বাংলাদেশৰ মাজত সম্পৰ্ক আছিল শত্ৰুতাৰ । মোদীকলৈ বাংলাদেশৰ বাতৰি কাকতত বিৰূপ মন্তৱ্য পঢ়িবলৈ পোৱা গৈছিল । কিন্তু তাৰ বিপৰীতে মোদী প্ৰধানমন্ত্ৰী হোৱাৰ পিছত এতিয়া মোদী হৈ পৰিছে বাংলাদেশৰ গলৰ মণি । ২৭ নভেম্বৰত ভাৰতলৈ বাংলাদেশৰ এটা প্ৰতিনিধি দল আহিছিল বুলি বাংলাদেশ প্ৰতিদিনত প্ৰকাশ পাইছে । আনহাতে অহা ১৮ ডিচেম্বৰত ভাৰতৰ ৰাষ্ট্ৰপতি প্ৰণৱ মুখাৰ্জীৰ আমন্ত্ৰণমৰ্মে বাংলাদেশৰ ৰাষ্ট্ৰপতি আবদুল হামিদ ভাৰতলৈ আহিব বুলি বাংলাদেশৰ বৈদেশীকপৰিক্ৰমা মন্ত্ৰী এইছ মাহমুদ আলীয়ে প্ৰকাশ কৰিছে । এই খবৰ প্ৰকাশ পাইছে বাংলাদেশ প্ৰতিদিন আৰু ইউনাইটেড নিউজ ২৪ত । ভাৰত বাংলাদেশৰ ওচৰত থাকিব বুলি বাংলাদেশত নিযুক্ত ভাৰতীয় হাইকমিচনাৰ পঙ্কজ শৰণে প্ৰকাশ কৰাৰ কথা প্ৰকাশ পাইছে বাংলাদেশ প্ৰতিদিনত । তাৰ বাহিৰেও বাংলাদেশ প্ৰতিদিনত ভাৰত বাংলাদেশ বন্ধুপ্ৰতিম দেশ বুলি এটা বাতৰি প্ৰকাশ পাইছে । বাংলাদেশৰ বাতৰি কাকতত বাংলাদেশ-ভাৰত সহযোগিতাৰ পৰিবেশ সৃষ্টি হৈছে বুলি প্ৰকাশ পোৱাৰ লগতে সীমা সমস্যাকলৈ সীমান্ত চুক্তি আগুৱাই আছে বুলি প্ৰথম আলো কাকতে লিখিছে । আনহাতে মোদীয়ে ঢাকাৰ স'তে সীমান্ত চুক্তি কাৰ্যকৰী হ'ব বুলি দিয়া ভাষ্য BBC বাংলা যোগে প্ৰকাশ হৈছে । ভাৰতে বাংলাদেশৰ লগত স্থলসীমান্ত চুক্তি বাস্তবায়ন কৰিব বুলি লিখিছে বাংলাদেশ প্ৰতিদিন কাকতত । ভাৰতে বাংলাদেশলৈ ডিজেল ৰপ্তানি কৰিব বিচাৰে বুলি প্ৰথম আলো কাকতত প্ৰকাশ পাইছে ।

যিটো সময়ত বিদ্যুৎ সমস্যাই অসমবাসীক জুৰুলা কৰি আছে সেই সময়তে ভাৰতে বাংলাদেশলৈ বিদ্যুৎ যোগান ধৰিবলৈ প্ৰস্তুত হৈ আছে । ভাৰতে বাংলাদেশৰ ওচৰত বিদ্যুৎ বিক্ৰী কৰিব বুলি বাংলাদেশ প্ৰতিদিনত প্ৰকাশ কৰাৰ বিপৰীতে ভাৰতে বাংলাদেশক আৰু বিদ্যুৎ দিব বুলি নৰেন্দ্ৰ মোদীয়ে কৈছে বুলি দৈনিক ডেসটিনি কাকতত প্ৰকাশ কৰিছে ।

('আসাম ই-নিউজ নেটৱাৰ্ক'ৰ হৈ কন্দৰ্পজিৎ কল্লোলৰ প্ৰতিবেদন, ০৩/১২/১৪)